||ప్రతీకాత్మక చిత్రం||

కర్ణాటకలో ఘోర రోడ్డు ప్రమాదం జరిగింది. ఈ దారుణ ఘటనలో 13 మంది దుర్మరణం చెందారు. ఆగి ఉన్న ట్యాంకర్‌ను టాటా సుమో ఢీకొనటంతో ఈ ప్రమాదం జరిగింది. మృతులంతా ఏపీకి చెందినవారే. ఏపీలోని సత్యసాయి జిల్లా గోరంట్ల నుంచి బెంగళూరు వెళ్తున్న టాటా సుమో వాహనం గురువారం ఉదయం 7 గంటలకు చిక్‌బళ్లాపూర్ శివారులోని జాతీయ రహదారి 44పై ఆగి ఉన్న ట్యాంకర్‌ను అత్యంత వేగంగా ఢీకొట్టింది. ఈ ప్రమాదంలో కారులో ఉన్న 12 మంది అక్కడికక్కడే మృతి చెందారు. తీవ్రంగా గాయపడిన మరో వ్యక్తి దగ్గరలోని దవాఖానలో చికిత్స పొందుతూ చనిపోయాడు. 

పొగమంచు వల్లే ఈ ప్రమాదం జరిగినట్లు తెలుస్తోంది. పొగ మంచు వల్ల రోడ్డు సరిగా కనిపించక ఈ ఘోరం జరిగి ఉంటుందని భావిస్తున్నట్లు చిక్‌బళ్లాపూర్ పోలీసులు వెల్లడించారు. మృతుల్లో 9 మంది పురుషులు, నలుగురు మహిళలు ఉన్నారని, వీరంతా వలస కూలీలని తెలిపారు. ప్రమాద ఘటనపై కర్ణాటక సీఎం సిద్ధరామయ్య, ఏపీ సీఎం జగన్మోహన్ రెడ్డి తీవ్ర దిగ్భ్రాంతి వ్యక్తం చేశారు. మృతుల కుటుంబాలకు రూ.2 లక్షల పరిహారం అందజేస్తున్నట్లు సిద్ధరామయ్య ప్రకటించారు.